پاکستان کا دورہ نہایت مفید رہا،مذاکراتی عمل میں پیشرفت ہوئی ہے ، عباس عراقچی

ماسکو:ایرانی وزیر خارجہ عباس عراقچی نے کہا ہے کہ پاکستان نے ایران اور امریکا کے درمیان ثالثی کا اہم کردار ادا کیا ، پاکستان سے حالیہ پیشرفت پر بات کرنا ضروری تھا۔

تفصیلات کے مطابق عباس عراقچی نے روس پہنچنے پر میڈیا سے گفتگو کرتے ہوئے کہا کہ مذاکراتی عمل میں کچھ پیشرفت ضرور ہوئی ہے،نامعقول امریکی مطالبات کے باعث دوسرے دور کا مقصد حاصل نہیں ہوسکا۔

میڈیا سے گفتگو میںان کا مزید کہنا تھا کہ آئندہ مذاکرات کن شرائط کے تحت دوبارہ شروع کیے جا سکتے ہیں ، اس پر گفتگو ہوئی ہے۔

عباس عراقچی نے کہا کہ پاکستان نے حالیہ عرصے میں ایران اور امریکہ کے درمیان مذاکرات میں ثالث کے طور پر اہم کردار ادا کیا ہے، جس کے باعث اب تک کی تازہ پیش رفت پر تبادلۂ خیال ضروری تھا۔

انہوں نے مزید کہا کہ مذاکراتی عمل میں بعض مقامات پر پیش رفت کے باوجود امریکہ کے غلط طرزِ عمل اور حد سے زیادہ مطالبات کے باعث مذاکرات کا گذشتہ دور اپنے اہداف حاصل نہیں کر سکا، اس لیے موجودہ صورتحال پر پاکستان میں دوستوں کے ساتھ مشاورت ناگزیر تھی۔

انہوں نے کہا کہ ایران اور ماسکو کے درمیان علاقائی اور عالمی امور پر قریبی مشاورت جاری رکھنے کے مقصد سے روس آیا ہوں،عباس عراقچی کا کہنا تھا کہ روسی صدر ولادیمیر پیوٹن سے آج ملاقات ہو گی۔ روسی صدر سے ملاقات میں جنگ کی پیش رفت اور موجودہ صورتِ حال کا جائزہ لینے کا اچھا موقع ہو گا۔

انہوں نے مزید بتایا کہ دورۂ عمان کے دوران دونوں ممالک کے درمیان آبنائے ہرمز پر بات چیت ہوئی، ایران اور عمان آبنائے ہرمز کے ساحلی ممالک ہیں، اس لیے باہمی مشاورت ناگزیر ہے۔