کتابیں صدیوں سے علم و دانائی اور رہنمائی کا لازوال ذریعہ رہی ہیں، وزیراعظم کا عالمی یومِ کتب پر پیغام

اسلام آباد: وزیراعظم محمد شہباز شریف نے عالمی یومِ کتب 23 اپریل 2026 کے موقع پر اپنے پیغام میں کہا ہے کہ وہ پاکستان اور دنیا بھر کے قارئین، مصنفین، ادیبوں، ناشرین، اساتذہ اور طلبہ کو کتابوں سے لگاؤ اور مطالعہ کے شوق پر دلی مبارکباد پیش کرتے ہیں۔

بیان میں وزیراعظم نے بالخصوص پاکستان کے ادباء اور اساتذہ کی قومی فکری ارتقاء میں تعمیری کردار اور ان کی بیش قدر خدمات کو خراجِ عقیدت پیش کیا۔

جاری کر دہ بیان میں شہبازشریف نے کہا کہ کتابیں صدیوں سے علم و دانائی اور رہنمائی کا لازوال ذریعہ رہی ہیں اور مطالعہ کی انقلابی قوت کا ادراک ایک باشعور ذہن کی علامت ہے۔ ان کے مطابق کتابیں نئی سوچ، مختلف نقطہ ہائے نظر اور ثقافتوں سے روشناس کراتی ہیں اور ذہنی افق کو وسعت دیتی ہیں۔

وزیراعظم نے کہا کہ کتابیں نہ صرف باشعور ذہن کی تشکیل اور تنقیدی سوچ کے فروغ کا ذریعہ ہیں بلکہ ہمدردی، امن اور برداشت جیسے اوصاف کو بھی فروغ دیتی ہیں، جو ایک پرامن اور ترقی یافتہ معاشرے کی بنیاد کو مضبوط کرتے ہیں۔

انہوں نے مزید کہا کہ موجودہ دور میں ٹیکنالوجی اور ڈیجیٹل ترقی کے باعث معلومات تک رسائی میں آسانی آئی ہے، تاہم اس کے ساتھ کتابوں اور مطالعہ کی اہمیت مزید بڑھ گئی ہے۔ مطالعہ کی عادت فکری نشوونما، تخلیقی صلاحیت اور باخبر شہری بننے کے لیے بنیادی حیثیت رکھتی ہے۔

وزیراعظم کا کہنا تھا کہ پاکستان کی شاندار ادبی روایات، علمی ورثہ اور علم و دانش قومی ترقی کے اہم ستون ہیں۔ کلاسیکی علوم سے لے کر جدید ادب تک، پاکستانی ادیبوں اور دانشوروں کی خدمات نئی نسل کے لیے مشعلِ راہ ہیں۔

انہوں نے زور دیا کہ نوجوان نسل میں مطالعہ کے رجحان کو فروغ دینا اور معیاری کتب تک رسائی کو یقینی بنانا نہایت ضروری ہے تاکہ انہیں باشعور اور ذمہ دار شہری بنایا جا سکے،وزیراعظم نے کہا کہ وفاقی وزارتِ تعلیم اور نیشنل بک فاؤنڈیشن مطالعہ کے فروغ، مصنفین و ناشرین کی معاونت اور معیاری و سستی کتب کی فراہمی کے لیے سرگرمِ عمل ہیں۔

اپنے پیغام کے اختتام پر وزیراعظم نے نوجوانوں، اساتذہ، والدین اور تعلیمی اداروں سے اپیل کی کہ وہ اجتماعی طور پر معاشرے میں مطالعہ کے فروغ میں اپنا کردار ادا کریں اور خواندگی، علم تک رسائی اور کتب کی قدر کو اجاگر کرنے کے لیے مشترکہ کوششیں کریں تاکہ ایک علم پر مبنی، باشعور اور روشن خیال پاکستان کی تعمیر ممکن ہو سکے۔