شکریہ پاکستان، شکریہ شہباز شریف، شکریہ فیلڈ مارشل، امریکی صدر ٹرمپ کا بیان

واشنگٹن ڈی سی:امریکی صدر ڈونلڈ ٹرمپ نےایک دفعہ وزیراعظم شہباز شریف ، فیلڈ مارشل سید عاصم منیر کو خراج تحسین پیش کرتے ہوئے شکریہ ادا کیا ہے۔

تفصیلات کے مطابق سماجی رابطے کی سائٹ ٹروتھ سوشل پر اپنے پیغام میں ڈونلڈ ٹرمپ نے کہا کہ شکریہ پاکستان، شکریہ وزیراعظم، شکریہ فیلڈ مارشل، دونوں شاندار شخصیات ہیں۔

بیان میں امریکی صدر ٹرمپ نے کہا کہ آج کا دن پوری دنیا کے لیے ایک شاندار دن ہے۔

علاوہ ازاں امریکی صدر نے مدد کے لئے سعودی عرب، متحدہ عرب امارات اور قطر سے بھی اظہار تشکر کیا،ڈونلڈ ٹرمپ نے کہا کہ ایران نے امریکا کی مدد سے تمام سمندری بارودی سرنگیں ہٹا دی ہیں یا ہٹا رہا ہے۔

امریکی صدر نے کہا کہ اب جب آبنائے ہرمز کا معاملہ ختم ہوچکا ہے، نیٹو کی جانب سے کال موصول ہوئی، اب ہمیں کسی کی مدد کی ضرورت نہیں ہے۔

ڈونلڈ ٹرمپ نے کہا کہ میں نے نیٹو سے کہا کہ اب دور رہیں، جب ضرورت تھی تو وہ صرف کاغذی شیر اور بے کار ثابت ہوئے۔

اس سے قبل بیان میں انہوں نے لکھا کہ ’آبنائے ہرمز مکمل طور پر کھلا ہے اور تجارتی سرگرمیوں کے لیے آزاد ہے‘۔ کچھ دیر بعد انہوں نے ایک اور بیان جاری کیا جس میں انہوں نے لکھا کہ ’آبنائے ہرمز تجارتی سرگرمیوں اور آمد و رفت کے لیے آزاد ہے لیکن امریکی بحریہ کی جانب سے ناکہ بندی بدستور نافذ رہے گی، اور اس کا اطلاق صرف اور صرف ایران پر ہوگا‘۔