امریکہ: ریاست ٹیکساس کی آئل ریفائنری میں زوردار دھماکے کے بعد آگ بھڑک اٹھی

ٹیکساس:امریکی ریاست ٹیکساس کی آئل ریفائنری میں زور دار دھماکا ہوا ہے جس کے بعد ریفائنری میں خوفناک آگ بھڑک اٹھی ۔

امریکی میڈیا رپورٹس کے مطابق واقعہ پورٹ آرتھر کے علاقے میں واقع ویلیرو آئل ریفائنری میں پیش آیا،ہیوسٹن سے تقریباً 145 کلومیٹر کے فاصلے پر واقع اس ’ولیرو ریفائنری‘ میں ہونے والے دھماکے کے حوالے سے شہر کی میئر شارلٹ ایم موزز نے میڈیا کو تفصیلات فراہم کرتے ہوئے بتایا کہ خوش قسمتی سے اس حادثے میں اب تک کسی جانی نقصان یا کسی شخص کے زخمی ہونے کی اطلاع موصول نہیں ہوئی ہے۔

رپورٹس کے مطابق عینی شاہدین اور سوشل میڈیا پر وائرل ویڈیوز میں دیکھا جا سکتا ہے کہ دھماکے کے بعد آگ کے بڑے شعلے اور سیاہ دھوئیں کے بادل آسمان کی طرف بلند ہو رہے ہیں، جس سے علاقے میں خوف و ہراس پھیل گیا۔

مقامی پولیس حکام کا کہنا ہے کہ ابتدائی تحقیقات کے مطابق آگ لگنے کی وجہ ایک صنعتی ہیٹر کا دھماکہ ہو سکتا ہے۔ تاہم واقعے کی مکمل وجوہات جاننے کیلئے مزید تحقیقات جاری ہیں۔

حکام کے مطابق خوش قسمتی سے اس واقعے میں کسی جانی نقصان کی اطلاع نہیں ملی، جبکہ فائر فائٹرز نے موقع پر پہنچ کر آگ پر قابو پانے کیلئے کارروائی شروع کر دی۔

ولیرو کمپنی کی ویب سائٹ کے مطابق اس ریفائنری میں تقریباً 770 ملازمین کام کرتے ہیں اور یہاں روزانہ 4 لاکھ 35 ہزار بیرل خام تیل کو صاف کرنے کی صلاحیت موجود ہے، جہاں خام تیل سے پیٹرول، ڈیزل اور جہازوں کا ایندھن تیار کیا جاتا ہے۔

یہ واقعہ ایسے وقت پیش آیا ہے جب عالمی سطح پر توانائی کی تنصیبات پہلے ہی حساس صورتحال کا شکار ہیں، جس کے باعث اس قسم کے حادثات پر عالمی توجہ مرکوز ہو رہی ہے۔