خیالِ نو کے وفد کا خانہ فرہنگ ایران کا دورہ، شہید آیت اللہ کے سانحۂ ارتحال پر تعزیت  کا اظہار

لاہور: امن اور اتحادِ بین المسلمین کے فروغ کے لیے سرگرم سماجی تنظیم خیالِ نو کے  وفد نے خانہ فرہنگ ایران کا دورہ کیا اور سپریم لیڈر آیت اللہ خامنہ ای کی شہادت کے سانحۂ ارتحال پر گہرے رنج و غم کا اظہار کرتے ہوئے ایران کی حکومت اور عوام سے دلی یکجہتی کا اظہار کیا۔

اس موقع پر وفد نے ڈائریکٹر جنرل خانہ فرہنگ ایران اصغر مسعودی سے ملاقات کی۔ ملاقات کے دوران بانی خیالِ نو حنین زیدی نے اظہارِ خیال کرتے ہوئے کہا کہ آغا رہبر کی شہادت نے امتِ مسلمہ کو اتحاد و یکجہتی کا درس دیا ہے۔ انہوں نے کہا کہ آیت اللہ کی قیادت اور خدمات ہمیشہ مسلمانوں کو باہمی اتحاد اور بھائی چارے کی طرف راغب کرتی رہیں گی۔

معروف نوجوان سماجی کارکن شہزاد روشن گیلانی نے کہا کہ آیت اللہ خامنائی کی شہادت سے ایسا محسوس ہوتا ہے جیسے عالمِ اسلام کے سر سے ایک بڑا سایہ اٹھ گیا ہو۔ انہوں نے مزید کہا کہ شہید آیت اللہ خامنائی نے اتحادِ امت کے لیے جو کردار ادا کیا، اس نے مسلمانوں میں نئی روح پھونک دی اور ان کی جدوجہد ہمیشہ یاد رکھی جائے گی۔

اس موقع پر ڈائریکٹر جنرل خانہ فرہنگ ایران اصغر مسعودی نے وفد کی آمد پر شکریہ ادا کرتے ہوئے کہا کہ ایران ہمیشہ خطے میں امن کا خواہاں رہا ہے اور مذاکرات کے عمل میں بھی پیش پیش رہا ہے، تاہم اگر مذاکرات کے دوران حملے کیے جائیں تو دفاع ناگزیر ہو جاتا ہے۔

وفد میں نوجوان صحافی فہد یوسف، احسان اللہ، عمران علی، زین امتیاز اور ثناء آغا خان شامل تھے، جبکہ خیالِ نو کے صدر اسد اعوان، عامر کاظمی اور وجاہت شاہ بھی اس موقع پر موجود تھے۔