خطے کی بدلتی صورتحال کے پیش نظر پیٹرولیم مصنوعات کی قیمتوں کے ہفتہ وار تعین کی منظوری

اسلام آباد:وزیراعظم کی زیر صدارت پیٹرولیم مصنوعات کے اسٹاک اور کھپت کے حوالے سے اہم اجلاس ہوام جس میں پیٹرولیم مصنوعات کی قیمتوں کے ہفتہ وار تعین کی منظوری دے دی گئی۔

تفصیلات کے مطابق وزیراعظم کی زیر صدارت ملک میں خطے کی بدلتی ہوئی صورتحال کے پیش نظر پیٹرولیم مصنوعات کے اسٹاک اور کھپت کے حوالے سے ہائی پاورڈ کمیٹی کا اجلاس منعقد ہوا، اجلاس میں وزیر خزانہ نے وزیراعظم کو تفصیلی بریفنگ دی۔

ذرائع کے مطابق کمیٹی نے ہفتہ وار قیمتوں کے تعین کے بارے میں سفارشات پیش کیں جسے وزیراعظم نے منظور کرلیا،ذرائع کامزید کہنا ہےکہ ان اقدامات کے باعث ایندھن اسٹاک کا مؤثر استعمال اور طلب میں کمی ہوسکے گی۔

دوران اجلاس میں آفسز، تعلیمی ادارے اور خدمات فراہم کرنے والے اداروں کے ورکنگ دنوں میں کمی کا پلان تیار کیا گیا ہے تاکہ ایندھن کے اسٹاک کا مؤثر استعمال ممکن ہو سکے۔

ذرائع کے مطابق اسی طرح تعلیمی اداروں میں ورچوئل نظام تعلیم اور دفاتر کے لیے ورک فرام ہوم کا پلان بھی طے کیا گیا ہے۔ یہ اقدامات ایندھن کی طلب میں کمی لانے اور اسٹاک کے مؤثر استعمال میں مددگار ثابت ہوں گے۔

مزید برآں، ذخیرہ اندوزی، غیر قانونی ذخیرہ اور اسمگلنگ روکنے کے لیے سخت کریک ڈاؤن کا بھی فیصلہ کیا گیا ہے۔