سکھس فار جسٹس کاغزہ بورڈ آف پیس کیلئے1ارب ڈالر کا اعلان، خالصتان کیلئے ریفرنڈم کا مطالبہ

واشنگٹن ڈی سی: سکھس فار جسٹس نے تاریخی اعلان کرتے ہوئے کہا ہے کہ وہ بورڈ آف پیس کے پہلے سرکاری اجلاس کیلئے ایک ارب ڈالر فراہم کرے گا۔

تفصیلات کے مطابق واشنگٹن ڈی سی میں امریکہ بھر سے سینکڑوں سکھ برادری کے افراد دارالحکومت میں جمع ہوئے اور امن، اتحاد اور سیاسی مطالبات کے حق میں آواز بلند کی،تقریب میں خالصتان کو ایک حل طلب سیاسی مسئلہ قرار دیتے ہوئے سفارتی اور جمہوری حل پر زور دیا گیا۔

شرکاء نے مطالبہ کیا کہ امریکی صدر ڈونلڈ ٹرمپ بھارتی وزیر اعظم مودی سے براہِ راست بات کریں تاکہ بھارتی زیر انتظام پنجاب میں امریکی محکمہ خارجہ کی نگرانی میں آزادی کا ریفرنڈم کرایا جائے۔

سکھس فار جسٹس کے جنرل کونسل گُرپتوانت سنگھ پنوُ ں نے کہا کہ خالصتان ریفرنڈم کے حامی سکھ نوجوانوں کو مبینہ جعلی مقابلوں میں نشانہ بنایا جا رہا ہے۔ اُن کا کہنا تھا کہ 11 ہزار سے زائد سکھ نوجوانوں کو سیاسی عقائد کی بنیاد پر گرفتار کر کے ‘گینگسٹر’ قرار دیا گیا ہے۔

انہوں نے مزید کہا کہ کسی بھی خونریز تصادم سے قبل صدر ٹرمپ کو یقینی بنانا ہوگا کہ ایک پرامن اور جمہوری حل کیلئے نگرانی شدہ ریفرنڈم کا انعقاد کیا جائے۔

احتجاج میں شریک افراد کا کہنا تھا کہ ان کا مقصد بورڈ آف پیس کا رکن بن کر پنجاب کو بھارت سے آزاد کرانا ہے اور وہ جمہوری اور پرامن طریقے سے آزادی چاہتے ہیں۔

ماہرین کے مطابق یہ اقدام امریکی سیاست میں خالصتان کے مطالبے کو اجاگر کرنے اور عالمی توجہ حاصل کرنے کی ایک کوشش ہے۔ ان کا کہنا ہے کہ اگرچہ اس سے بھارت اور امریکہ کے تعلقات متاثر ہو سکتے ہیں، تاہم مقصد تشدد سے گریز کرتے ہوئے مسئلے کا پرامن حل تلاش کرنا ہے۔