پی سی بی کا بڑا فیصلہ، پی ایس ایل میچز بھارت میں نشر نہیں ہوں گے

لاہور: پاکستان کرکٹ بورڈ(پی سی بی) کی جانب سے کہا گیا ہےکہ پاکستان سپر لیگ (پی ایس ایل) کے گیارہویں ایڈیشن کے میچز بھارت میں ٹیلی کاسٹ نہیں ہوں گے۔ 

پی سی بی حکام کے مطابق انٹرنیشنل میڈیا رائٹس کے لیے پی سی بی کی مقررہ ریزرو قیمت سے بھی زیادہ بولی لگی۔ گزشتہ سال کے مقابلے میں انٹرنیشنل میڈیا رائٹس کی مالیت میں 149 فیصد اضافہ ہوا ہے۔ یہ اضافہ ایچ بی ایل پی ایس ایل کی بڑھتی ہوئی مقبولیت اور برانڈ ویلیو کا واضح ثبوت ہے۔

اس حوالے سے سی ای او پی ایس ایل سلمان نصیر نے کہا کہ پی ایس ایل دنیا کی صفِ اول کی ٹی ٹوئنٹی لیگز میں اپنی جگہ مضبوط کر رہا ہے۔

انٹرنیشنل میڈیا رائٹس میں 149 فیصد اضافہ ایچ بی ایل پی ایس ایل پر عالمی اعتماد کا عکاسی ہے۔ پی ایس ایل کی مسابقتی اور معیاری کرکٹ نے دنیا  بھر کے شائقین کی توجہ حاصل کر لی ہے۔

تاہم اس دفعہ پی سی بی نے بھارت ریجن میں پی ایس ایل میچز دکھانے کے حقوق فروخت نہ کرنےکا فیصلہ کرلیا ہے تاہم دوسرے تمام ریجنز کے لیے یہ حقوق فروخت کیے جائیں گے۔

پاکستان کرکٹ بورڈ کے اس فیصلے کے بعد بھارتی شائقین اب پی سی ایل کے میچز نہیں دیکھ سکیں گے۔

واضح رہے کہ پی ایس ایل کے گیارہویں ایڈیشن کا آغاز 26 مارچ سے ہوگا اور بھارت کے سوا دنیا بھر میں یہ میچز براہ راست  دیکھے جاسکیں گے۔
اس دفعہ پی ایس ایل میں دونئی ٹیموں کا اضافہ ہوا ہے جس کے بعد ٹیموں کی مجموعی تعداد آٹھ ہوگئی ہے، پی ایس ایل کی تاریخ میں پہلی بار پلیئرز آکشن کی تقریب 11 فروری کو منعقد ہوگی۔