عمران خان کبھی ملک چھوڑنے کا سوچ بھی نہیں سکتے، علی امین گنڈاپور

وزیر اعلیٰ خیبر پختونخوا، علی امین گنڈاپور نے کہا ہے کہ پاکستان تحریک انصاف کے بانی عمران خان نے ہمیشہ یہی مؤقف اختیار کیا ہے کہ وہ ملک سے باہر نہیں جائیں گے۔

ایک انٹرویو میں ان کا کہنا تھا کہ بعض مفروضے اور افواہیں جان بوجھ کر پھیلائی جاتی ہیں جن کا مقصد تحریک انصاف کو نقصان پہنچانا ہوتا ہے۔ عمران خان نے نہ کبھی ملک چھوڑنے کی خواہش ظاہر کی، نہ ایسا سوچا۔

انہوں نے مزید کہا کہ بانی پی ٹی آئی نے مجھے وزیر اعلیٰ بنایا، ان ہی کی حکومت ہے، ان ہی کا مینڈیٹ ہے۔ آج میں اس منصب پر ان کے اعتماد کے باعث موجود ہوں۔ جو لوگ سازشوں کا حصہ بن رہے ہیں، وہ دراصل مخالفین کے ایجنڈے پر کام کر رہے ہیں، نہ کہ بانی پی ٹی آئی کے۔

وزیر اعلیٰ کا کہنا تھا کہ مسائل کا حل مذاکرات میں ہے، آپریشن کوئی مستقل حل نہیں۔ ماضی میں بھی کئی آپریشن کیے گئے مگر خاطر خواہ نتائج حاصل نہ ہو سکے۔

علی امین گنڈاپور نے اس بات پر زور دیا کہ ہمیں سب سے پہلے افغانستان کے ساتھ تعلقات بہتر بنانے کی ضرورت ہے، کیونکہ خطے میں امن کے لیے یہ تعلقات کلیدی حیثیت رکھتے ہیں۔

انہوں نے کہا کہ عوام کے اعتماد کے بغیر نہ کوئی جنگ لڑی جا سکتی ہے، نہ جیتی جا سکتی ہے۔ حکومت، اداروں اور عوام کے درمیان اعتماد کا ہونا بے حد ضروری ہے۔ اگر یہ بھروسا نہ ہو تو کامیابی ممکن نہیں۔

ان کا کہنا تھا کہ اگر مسائل پر کھل کر بات نہ کی جائے تو ایک معمولی مسئلہ بھی کینسر بن جاتا ہے۔ جب تک ملک میں امن قائم نہیں ہوگا، ترقی ممکن نہیں۔ ہم عوام کے اعتماد کے ساتھ دہشت گردی کا خاتمہ کریں گے۔