بچے مجھ سے ملنے پاکستان آئیں گے،کسی سیاست یا احتجاجی تحریک کا حصہ نہیں بنیں گے،بانی پی ٹی آئی

راولپنڈی پاکستان تحریک انصاف( پی ٹی آئی) کے بانی چئیرمیں عمران خان نے کہا ہے کہ بچے صرف مجھ سے ملنے پاکستان آئیں گے،وہ کسی سیاست یا احتجاجی تحریک کا حصہ نہیں بنیں گے۔

تفصیلات کے مطابق اڈیالہ جیل راولپنڈی میں توشہ خانہ ٹو کیس کی سماعت ہوئی، کیس کی سماعت اسپیشل جج سینٹرل شاہ رخ ارجمند نے سماعت کی۔

دوران  سماعت بانی پی ٹی آئی اور اہلیہ بشریٰ بی بی کو کمرہ عدالت میں پیش کیا گیا جبکہ گواہ نیب افسر آفتاب احمد کا بیان قلمبند کیا گیا۔
 بشریٰ بی بی کے وکیل ارشد تبریز نے گواہ کے بیان پر جرح مکمل کر لی جبکہ بانی پی ٹی آئی کے وکیل قوسین مفتی آئندہ سماعت پر جرح کریں گے،عدالت نے دو مزید گواہان رابعہ اور ثنا کو آئندہ سماعت پر طلب کر لیا۔

بعدازاں عدالت نے سماعت 6 اگست تک ملتوی کردی جس کے بعدبانی پی ٹی آئی کی ان کے صاحبزادوں قاسم اور سلیمان سے بات کروائی گئی۔

دوران سماعت بانی پی ٹی آئی اڈیالہ جیل میں توشہ خانہ ٹو کیس کی سماعت کے دوران صحافیوں سے گفتگو میں تصدیق کی ہے کہ ان کی اپنے بچوں سے ڈیڑھ گھنٹے ٹیلیفون پر گفتگو کروائی گئی ہےاور اب جیل میں ان کے اخبارات بھی بحال کر دیئے گئے ہیں۔

واضع رہے کہ عمران خان کی ہمشیرہ علیمہ خان نے انکشاف کیا ہے کہ ان کے صاحبزادے قاسم اور سلیمان پاکستان کے ویزوں کے لیے درخواست دے چکے ہیں اور وزارتِ داخلہ کی منظوری کے منتظر ہیں۔

خیال رہے کہ جولائی 2024 میں بانی پی ٹی آئی نے بیٹوں سے بات نہ کروانے کے خلاف درخواست دائر کر دی تھی جس پر سماعت اے ٹی سی راولپنڈی کے جج ملک اعجاز آصف نے کی تھی اور جیل انتظامیہ کو نوٹس جاری کیا تھا۔

تاہم بعد ازاں دوران سماعت عدالت نے اپیل پر فیصلہ سناتے ہوئے بانی پی ٹی آئی کو بیٹوں سے ٹیلیفون پر بات کرنے کی اجازت دی تھی۔