مودی سرکار نے گھٹنے ٹیک دئیے،ٹرمپ کی دھمکی کے بعد روس سے تیل کی خریداری بند کردی

نئی دہلی: انتہا پسند مودی سرکار نے ٹرمپ کی دھمکی کے آگئے گھٹنے ٹیک دئیے، امریکی صدرکی دھمکی کے بعد بھارت کی سرکاری آئل ریفائنریز نے روس سے تیل کی خریداری روک دی۔

غیر ملکی خبررساں ایجنسی نے ذرائع کے حوالے سے بتایا ہے کہ 4 بھارتی آئل  ریفائنریز نے روس سے تیل کی خریداری گزشتہ ہفتے روکی۔

رپورٹس کے مطابق بھارت کی سب سے بڑی سرکاری ریفائنری، انڈین آئل کارپوریشن(آئی سی او) جو ملک کی 20 میں سے 10 ریفائنریز چلاتی ہے، ان کمپنیوں میں شامل ہے جنہوں نے روسی تیل کی خریداری روک دی ہے۔ 

اس کے علاوہ ہندستان پیٹرولیم، بھارت پیٹرولیم اور منگلور ریفائنری اینڈ پیٹروکیمیکلز جیسے دیگر سرکاری اداروں نے بھی یہی راستہ اپنایا ہے۔
تاہم دوسری جانب بھارتی آئل ریفائنریز اور وزارت توانائی نے اس خبر پر تبصرہ نہیں کیا۔

 رپورٹس کے مطابق بھارت تیل درآمد کرنے والا دنیا کا تیسرا بڑا ملک ہے جبکہ روس کے سمندری خام تیل کا سب سے بڑا خریدار ہے۔

خیال رہے کہ امریکی صدر ٹرمپ نے 14 جولائی کو روس سے تیل خریدنے والے ممالک پر 100 فیصد ٹیرف لگانے کی دھمکی دی تھی، گزشتہ روز ٹرمپ نے روس سے اسحلہ اور توانائی خریدنے کے باعث بھارت پر 25 فیصد تجارتی ٹیرف اور اضافی پینلٹی کا اعلان کیا تھا۔

آج اپنے بیان میں ٹرمپ نے پاکستان کے ساتھ تجارتی معاہدے کا اعلان کرتے ہوئے کہا تھا کہ امریکا پاکستان کے تیل ذخائر بڑھانے کے لیے اقدام کرے گا،  شاید ایک دن ایسا آئے جب پاکستان تیل بھارت کو فروخت کرے۔