زرعی قوانین کیخلاف کسانوں کی بھوک ہڑتال ،نئی دہلی میں انٹرنیٹ سروس معطل

تفصیلات کے مطابق بھارت میں ہزاروں  کسانوں کا  زرعی قوانین کے خلاف احتجاج جاری ہے، بھارتی میڈیا رپورٹس کے مطابق پولیس کے ساتھ ایک ہفتے جاری رہنے والی جھڑپوں کے بعد کسان مظاہرین آج ایک روز کیلئےبھوک ہڑتال کر رہے ہیں۔ بھارتی وزارت داخلہ نے امن و امان کی صورتحال کو مدنظر رکھتے ہوئے  دہلی کے تین سرحدی علاقوں میں انٹرنیٹ سروسز معطل کردی ۔ انٹرنیٹ سروسز  اتوار کی رات 11 بجے تک بند رکھنے کا اعلان کیا گیا ہے ۔

اس سے قبل بھارت کے  یوم جمہوریہ کے موقع پر دہلی کی سرحد پر ہزاروں ناراض  کسانوں نے احتجاج ریکارڈ کروایا تھا ۔ بھارتی یوم جمہوریہ کے دن  پرتشدد احتجاج کے دوران کچھ عناصر نے  لال قلعے پر خالصتان تحریک کا پرچم لہرا دیا تھا جہاں ان  جھڑپوں  میں ایک شخص ہلاک اور سیکڑوں زخمی ہو گئے تھے۔

خیال رہے کہ مودی حکومت کے زرعی قوانین کے خلاف کسان دو ماہ سے زائد عرصے سے  احتجاج کر رہے ہیں۔  مسئلے کے حل کے لیے کسان رہنماؤں اور حکومت کے درمیان مذاکرات  تاحال11ادوار  ناکام ہو چکے ہیں، حکومت نے ان قوانین کو 18 ماہ کے لیے مؤخر کرنے کی پیشکش کی تھی  لیکن کسانوں  کا کہنا ہے کہ وہ اس قانون میں تبدیلی سے کم کسی بھی چیز پر احتجاج ختم نہیں کریں گے۔

خیال رہے کہ  بھارت میں زرعی اصلاحات کے قانون کی ستمبر میں منظوری دی گئی  اور اس وقت سے کسان دہلی کی سرحدوں پر دھرنا دیے بیٹھے ہیں  ۔مودی سرکار  نے کسانوں کا جلوس روکنے کے لیے سپریم کورٹ سے بھی رابطہ کیا، لیکن بھارتی چیف جسٹس  بینچ نے اسے پولیس معاملہ قرار دےدیا۔ بھارتی وزیراعظم نریندر مودی  اس  متنازع  قانون کو  زراعت کے شعبے میں  لاکھوں کسانوں کوبااختیار بنانے   کے لیے ضروری سرمایہ کاری  اور جدت پسندی کی حوصلہ افزائی قرار دے چکے ہیں جبکہ اپوزیشن جماعت کانگریس کسانوں کی حمایت کرتی نظر آتی ہے ۔

کسانوں کی احتجاجی تنظیم نے یکم  فروری کو  سالانہ بجٹ  کے موقع پر پارلیمنٹ کے باہر مارچ کا  بھی اعلان کررکھا ہے ۔ حالیہ برسوں میں بھارت میں  خشک سالی اور قرضوں کے بڑھتے بوجھ کی وجہ سےاب تک ہزاروں کسان خودکشی کرچکے ہیں ۔