علی ظفربالی وڈ اداکارہ کترینہ کیف کے حق میں بول پڑے

ویب ڈیسک: پاکستانی گلوکار علی ظفر نے بالی وڈ اداکارہ کترینہ کیف کے بڑھتے وزن پر ہونے والی سوشل میڈیا تنقید کے خلاف آواز اٹھاتے ہوئے اداکارہ کا دفاع کیا ہے۔

کترینہ کیف کو بیٹے کی پیدائش کے بعد سے فلموں سے دور دیکھا جا رہا ہے۔ حال ہی میں وہ اپنے شوہر وکی کوشل کے ہمراہ ایک تقریب میں نظر آئیں، جہاں سبز لباس میں ان کی تصاویر اور ویڈیوز سوشل میڈیا پر وائرل ہوگئیں۔

تاہم صارفین نے اداکارہ کے وزن میں اضافے پر تبصرے کیے اور ان کی ماضی کی تصاویر بھی شیئر کیں۔

علی ظفر نے تنقید کا جواب دیتے ہوئے کہا کہ مردوں کو اپنے رویوں پر غور کرنے اور خود کو درست کرنے کی ضرورت ہے، کیونکہ ہر شخص زندگی میں غلطیاں کرتا ہے اور اصلاح کی گنجائش موجود رہتی ہے۔

انہوں نے کہا کہ خواتین کے جسم اور ظاہری خوبصورتی سے متعلق ایک مخصوص سوچ قائم کرلی گئی ہے، جو درست نہیں۔ ہمیں معلوم نہیں کہ کوئی شخص اپنی زندگی میں کن حالات سے گزر رہا ہے، اس لیے دوسروں کے ساتھ اچھا برتاؤ کرنا چاہیے۔

علی ظفر نے کہا کہ زندگی مختصر ہے، اس لیے دوسروں کو خوش رہنے دیں اور اپنی زندگی پر توجہ دیں۔