پاکستان نے بھارت کو نہ صرف فوجی محاذ بلکہ سفارتی اور بیانیہ محاذ پر بھی شکست دی،عطا تارڑ

اسلام آباد: وفاقی وزیر اطلاعات و نشریات عطا اللہ تارڑ نے کہا ہے کہ پاکستان نے بھارت کو نہ صرف فوجی محاذ بلکہ سفارتی اور بیانیہ محاذ پر بھی شکست دی۔
تفصیلات کے نطابق آج پاکستان ٹیلیویژن( پی ٹی وی )کو انٹرویو دیتے ہوئے انہوں نے کہا کہ وزارت اطلاعات، آئی ایس پی آر اور پاکستانی میڈیا نے کامیابی سے حقائق پیش کرکے بھارت کے جھوٹ اور بے بنیاد دعوئوں کو بے نقاب کیا۔

انٹرویو میں وزیر اطلاعات نے پاکستانی میڈیا کی ایسے وقت میں پختہ، ذمہ دارانہ اور حقائق پر مبنی رپورٹنگ کو سراہا جب بھارتی میڈیا جھوٹی رپورٹنگ کے ذریعے جنگی جنون میں مصروف تھا۔

انہوں نے مزید کہا کہ بھارتی میڈیا نے لاہور اور ملتان میں خیالی بندرگاہوں کو نشانہ بنانے کا دعویٰ بھی کیا تھا جبکہ یہ سب جانتے ہیں کہ ان دونوں شہروں میں سمندر موجود ہی نہیں ہے۔

ایک سوال کے جواب میں انہوں نے کہا کہ پاکستان امن پر یقین رکھتا ہے لیکن اس خواہش کو کمزوری نہ سمجھا جائے۔ انہوں نے مزید کہا کہ پاکستان کا دفاع مضبوط اور با صلاحیت ہاتھوں میں ہے۔