پاکستان ویمنز ٹیم کی ترکس اینڈ کیکوس آئی لینڈز کو ہراکر فیفا سیریز میں تاریخی کامیابی سمیٹ لی

آئیوری کوسٹ: فیفا سیریز میں پاکستان نے اپنے پہلے میچ میں ٹرکس اینڈ کیکوس جزائر کو آٹھ صفر سے ہراکر تاریخی فتح حاصل کرلی،یہ پاکستان ویمن ٹیم کی انٹرنیشنل فٹبال میں سب سے بڑے مارجن سے فتح ہے۔

تفصیلات کے مطابق آئیوری کوسٹ کے شہر عابد جان میں فیفا سیریز میں پاکستان ویمن اور ٹرکس اینڈ کیکوس جزائر ویمن کی فٹبال ٹیموں کے درمیا ن میچ تھا جس میں پاکستان خواتین نے شاندار کارکردگی کا مظاہرہ کیا۔

قومی ٹیم نے ابتدا سے ہی حریف پر دباؤ رکھا جس کے نتیجے میں پہلے ہاف کے اختتام تک چار صفر کی برتری حاصل کرلی گئی۔

پاکستان کی جانب سے گول زہمینہ ملک، اقصیٰ مشتاق، لیلیٰ بنارس اور مریم محمود نے کیے، دوسرے ہاف میں پاکستانی کھلاڑیوں نے تیز رفتار کھیل جاری رکھا اور مزید چار گول داغ کر میچ آٹھ صفر سے اپنے نام کرلیا۔

اس ہاف میں لیلیٰ بنارس اور اقصیٰ مشتاق نے مزید ایک، ایک گول کیا جب کہ دیگر دو گول نادیہ خان اور اسریٰ خان نے کیے ۔

خیال رہے کہ  یہ انٹرنیشنل ویمن فٹبال میں پاکستان کی سب سے بڑے مارجن سے فتح ہے، اس سے قبل پاکستان نے مالدیپ کو سات صفر سے ہرایا تھا۔