وزیر اعظم سے ترکیہ کے وفد کی ملاقات،برادرانہ تعلقات اور جامع معاشی شراکت داری پر تبادلہ خیال

اسلام آباد:وزیر اعظم محمد شہباز شریف نے کہا ہے کہ صدیوں پر محیط پاکستان اور ترکیہ کےبرادرانہ تعلقات تیزی سے ایک جامع معاشی شراکت داری کی جانب گامزن ہیں۔ شہریوں کی انصاف تک رسائی کے حصول کیلئے پاکستان اور ترکیہ ایک دوسرے کے تجربات سے استفادہ حاصل کر سکتے ہیں۔

تفصیلات کے مطابق اسلام آباد میں جمہوریہ ترکیہ کی آئینی عدالت کے صدر قادر اوزقایا (KADIR ÖZKAYA ) کی سربراہی میں وفد سے ملاقات میں وزیراعظم کا کہنا تھا کہ ترکیہ کے وفد کی حالیہ دورے کے دوران دستخط ہونے والی مفاہمتی یادداشت اس منزل کی طرف پہلا قدم ہے۔

دوران ملاقات انہوں نے کہا کہ انصاف کی جلد فراہمی کے لیے ڈیجیٹل ٹیکنالوجی کے استعمال کے سلسلے میں دونوں ممالک کے درمیان تجربات کے تبادلہ کی وسیع استعداد موجود ہے۔

ملاقات میں محمد شہباز شریف نے کہا کہ پاکستان اور ترکیہ موسمیاتی تبدیلی ، انسداد دہشتگری ، امیگریشن اور دیگر شعبوں میں قوانین اور انکے نفاذ کے سلسلے میں ایک دوسرے کے تجربات سے استفادہ حاصل کر سکتے ہیں۔

اس موقع پر ترکیہ کے عدالتی جج کے صدر نے پاکستان میں شاندار مہمان نوازی پر اظہار تشکر کرتے ہوئے کہا کہ پاکستان کے ساتھ محبت ہر ترک کی رگوں میں بسی ہے۔

ان کامزید کہنا تھا کہ ترکیہ کی آئینی عدالت 64 سال پرانی ہے اور اپنے اس وسیع تجربے کے تبادلے کیلئے پاکستان کے ساتھ ایک پائلٹ پراجیکٹ شروع کرنے کے لیے تیار ہیں۔