بانی پی ٹی آئی اوراہلیہ بشریٰ بی بی کیخلاف 190 ملین پاؤنڈ کیس سماعت کیلئے مقرر

اسلام آباد: 190 ملین پاؤنڈ کیس میں سزا یافتہ پاکستان تحریک انصاف (پی ٹی آئی) کے بانی چئیرمین عمران خان اور ان کی اہلیہ بشریٰ بی بی کے درخواستیں اسلام آباد ہائیکورٹ میں سماعت کیلئے مقرر ہوگئیں ہیں۔

تفصیلات کے مطابق اسلام آباد ہائیکورٹ کے رجسٹرار آفس نے بانی پی ٹی آئی اور بشریٰ بی بی کیس کی کاز لسٹ جاری کر دی ، چیف جسٹس سردار سرفراز ڈوگر اور جسٹس محمد آصف درخواستوں پر سماعت کریں گے۔

نیب نے سزا معطلی کی درخواستیں قابلِ سماعت نہ ہونے کا اعتراض اٹھا رکھا ہے ، بانی پی ٹی آئی اور بشریٰ بی بی نے سزا معطلی درخواستیں دائر کر رکھی ہیں۔

خیال رہے کہ احتساب عدالت نے بانی پی ٹی آئی اور ان کی اہلیہ بشریٰ بی بی کو 17 جنوری 2025 کو سزائیں سنائی تھیں۔