اسحاق ڈار سے کمبوڈیا کی وزیر تجارت جم نمول کی ملاقات، دوطرفہ شراکت داری کو مضبوط بنانے پر اتفاق

اسلام آباد:وزیر خارجہ وڈپٹی وزیر اعظم سینٹیرمحمد اسحاق ڈار سے مملکت کمبوڈیا کی وزیر تجارت چم نمول نے ملاقات کی جس میں دونوں ممالک کے مابین باہمی تعلق اور دو طرفہ امور پر گفتگو کی گئی۔

تفصیلات کے مطابق ترجمان دفتر خارجہ طاہر حسین اندرابی نے بتایا کہ نائب وزیرِ اعظم اسحاق ڈار نے آج وزارتِ خارجہ میں مملکتِ کمبوڈیا کی وزیرِ تجارت چم نِمول سے ملاقات کی ہے۔

ترجمان نے بتایا کہ فریقین نے دوطرفہ شراکت داری کو مضبوط بنانے  کے لیے قریبی تعاون کی باہمی خواہش کا اعادہ کیا، خصوصی طور پر معیشت، تجارت اور سرمایہ کاری کے شعبوں میں قریبی تعاون کے فروغ پر زور دیا گیا۔ 

طاہر حسین اندرابی کے مطابق یہ شعبے پاکستان کمبوڈیا مشترکہ تجارتی کمیٹی کے دائرۂ کار میں آتے ہیں،نائب وزیرِ اعظم نے آسیان (ASEAN) کے ساتھ پاکستان کی جاری روابط کو اُجاگر کیا، انہوں نے تنظیم کے ساتھ تعاون کو مزید فروغ دینے کی پاکستان کی خواہش کا اعادہ کیا۔