امریکا، برطانیہ، ایران اور آسٹریلیا کی اسلام آباد میں خودکش دھماکے کی مذمت

اسلام آباد: عالمی برادری نے وفاقی دارالحکومت اسلام آبادکے علاقے ترلائی میں نماز جمعہ کے دوران ہونے والے خودکش دھماکے کی شدید مذمت کی ہے۔

امریکا 

تفصیلات کے مطابق پاکستان میں تعینات امریکی سفیر نیٹلی بیکر آج اسلام آباد میں ہونے والے دہشت گرد حملے کی شدید مذمت کرتے ہوئے کہا ہے کہ دھماکے کے نتیجے میں بے گناہ نمازی جاں بحق اور زخمی ہوئے، امریکا اس واقعے سمیت ہر قسم کی دہشت گردی اور تشدد کی مذمت کرتا ہے۔

بیان میں نیٹلی بیکرنے کہا کہ امریکا کی جانب سے میں اس حملے میں زخمی اور جاں بحق ہونے والوں کے اہل خانہ اور عزیز و اقارب سے دلی تعزیت اور ہمدردی کا اظہار کرتی ہوں۔ 

ان کا مزید کہنا تھا کہ شہریوں اور عبادت گاہوں کے خلاف دہشت گردی اور انہیں نشانہ بنانا ناقابل قبول ہے۔ پاکستانی عوام حفاظت اور وقار کے ساتھ ، خوف کے بغیر اپنے عقیدے پر عمل کرنے کے حقدار ہیں۔

نیٹلی بیکر نے مزید کہا کہ امریکا امن و سلامتی کے فروغ کے لیے پاکستان کی کوششوں کی حمایت جاری رکھے ہوئے ہے اور استحکام کے لیے اپنی شراکت داری پر قائم ہے۔ ہم اس مشکل وقت میں پاکستان کے ساتھ کھڑے ہیں۔

ایرانی سفیر کا بیان

ایرانی سفیررضا امیری مقدم نے سماجی رابطے کی ویب سائٹ ایکس پراپنے بیان میں کہا کہ ایران کی حکومت اور عوام کی جانب سے دہشت گرد حملے کی سخت مذمت کرتے ہیں۔

سفیررضا امیری مقدم کا کہنا تھا کہ ہماری دعائیں ان خاندانوں کے ساتھ ہیں جنہوں نے اپنے پیاروں کو کھو دیا جب کہ زخمیوں کی جلد اور مکمل صحت یابی کے لیے بھی دعاگو ہیں۔

انہوں نے دعا کی کہ اللہ تعالیٰ شہدا کو اپنی رحمتوں میں جگہ دے اور انہیں جنت الفردوس میں اعلیٰ مقام عطا فرمائے۔
برطانوی ہائی کمیشن کا بیان

برطانیہ کا اظہار مذمت

برطانیہ نے بھی اسلام آباد میں ہونے والے خودکش حملے کی شدید مذمت کی ہے ، برطانیہ کی جانب سے حملے میں شہید ہونے والوں کے لواحقین سے اظہار تعزیت کیا گیا۔

سماجی رابطے کی ویب سائٹ ایکس پر پوسٹ کرتے ہوئے برطانوی ہائی کمشنر جین میریٹ نے معصوم جانوں کے ضیاع پر اظہار افسوس اورمتاثرہ خاندانوں کے ساتھ اظہار یکجہتی کیا۔

بیان میں برطانوی ہائی کمیشن نے کہا کہ ایسی پرتشدد کارروائیاں ناقابلِ قبول اور قابلِ نفرت ہیں،دہشتگردی کے خلاف جنگ میں پاکستان کے ساتھ اظہار یکجہتی کرتےہیں۔

آسٹریلوی ہائی کمیشن کی مذمت

آسٹریلوی ہائی کمشنر ٹموتھی کین نے بھی اسلام آباد میں خود کش حملے کی شدید الفاظ میں مذمت کی ہے،ہائی کمشنر نے کہا کہ مسجد پر ہولناک حملے پر شدید صدمہ اور افسوس ہوا، میری ہمدردیاں تمام متاثرین اوران کے اہلِ خانہ کے ساتھ ہیں، اس مشکل گھڑی میں آسٹریلیا پاکستان کے ساتھ کھڑا ہے اور سوگ میں برابر کا شریک ہے۔

واضح رہے کہ اسلام آباد کے علاقے ترلائی میں نمازِ جمعہ کے دوران مسجد میں ہونے والے خودکش دھماکے کے نتیجے میں 31 افراد جاں بحق اور 169 سے زائد زخمی ہوگئے ہیں۔

پولیس ذرائع کے مطابق ترلائی میں نماز جمعہ کے دوران خودکش حملہ آور نے مسجد میں داخل ہونے کی کوشش کی جسے وہاں موجود افراد نے روکا جس پر اس نے خود کو دھماکے سے اڑا لیا۔