بلوچستان میں آپریشن ردّالفتنہ کے نمایاںاثرات، بدنام زمانہ دہشتگردوں نے ہتھیار ڈال دئیے

کوئٹہ:بلوچستان میں سکیورٹی فورسز کے آپریشن ردّالفتنہ کے نمایاں ثمرات سامنے آ رہے ہیں، جہاں علاقے کے بدنام دہشت گردوں نے ہتھیار ڈال دئیے۔

تفصیلات کے مطابق بلوچستان میں قیامِ امن کے لیے سکیورٹی فورسز اور وزیراعلیٰ بلوچستان کے بھائی میر آفتاب بگٹی کی کوششیں کامیاب ہو گئیں،بلوچستان میں دہشت گردی، لوٹ مار اور دیگر جرائم میں ملوث عناصر کے ایک گروہ نے ریاستِ پاکستان کے سامنے سرنڈر کر دیا۔ 

میراک خان چکرانی نے اپنے 25 ساتھیوں سمیت ریاست کے سامنے سرینڈر کرتے ہوئے ہتھیار ڈال دئیے۔ سرنڈر کرنے والا گروہ ماضی میں ڈکیتی اور بھتہ خوری کی وارداتوں میں ملوث رہا ہے۔

سرینڈر کرنے والے عناصر نے بھاری مقدار میں اسلحہ اور گولہ بارود بھی جمع کرایا۔ میراک خان چکرانی نے شدت پسند عناصر کے خلاف چکرانی امن فورس میں شمولیت کا بھی اعلان کیا ہے۔

آپریشن ردّالفتنہ کی بہترین حکمت عملی کے باعث بلوچستان کے دیگر شدت پسند اور جرائم پیشہ عناصر کے بھی جلد ریاستِ پاکستان کے سامنے سرنگوں ہونے کی توقع ظاہر کی گئی ہے۔