پاکستان کی ٹرائی نیشن سیریز میں مسلسل دوسری فتح، یو اے ای کو 31 رنز سے شکست

شارجہ کرکٹ اسٹیڈیم میں کھیلے گئے سہ ملکی سیریز کے دوسرے ٹی ٹوئنٹی میچ میں پاکستان نے متحدہ عرب امارات (یو اے ای) کو 31 رنز سے شکست دے دی۔ اس کامیابی کے ساتھ ہی پاکستان نے سیریز میں مسلسل دوسری فتح حاصل کرتے ہوئے پوائنٹس ٹیبل پر اپنی برتری مزید مستحکم کر لی ہے۔

پاکستان کی جانب سے دیے گئے 208 رنز کے ہدف کے تعاقب میں یو اے ای کی ٹیم 8 وکٹوں کے نقصان پر صرف 176 رنز ہی بنا سکی۔

یو اے ای کے بیٹر آصف خان نے شاندار 77 رنز کی اننگز کھیلی، جبکہ محمد وسیم 33 رنز بنانے میں کامیاب رہے۔

پاکستان کی بولنگ میں حسن علی نمایاں رہے، جنہوں نے 47 رنز کے عوض 3 کھلاڑیوں کو آؤٹ کیا۔ محمد نواز نے 2 وکٹیں حاصل کیں، جب کہ صائم ایوب اور سلمان مرزا نے ایک، ایک وکٹ حاصل کی۔

پاکستان کی بیٹنگ:

میچ کا آغاز پاکستان کی بیٹنگ سے ہوا، جس میں اوپنر صائم ایوب نے 69 رنز کی جارحانہ اننگز کھیلی، جبکہ حسن نواز نے 56 رنز اسکور کیے۔ محمد نواز نے 25 اور فہیم اشرف نے 16 رنز بنائے۔ تاہم، 7 کھلاڑی ڈبل فگر میں داخل نہ ہو سکے اور پاکستان کی ٹیم 207 رنز پر آل آؤٹ ہو گئی۔

یو اے ای کی جانب سے جنید صدیقی اور ساغر خان نے 3،3 جبکہ حیدر علی نے 2 وکٹیں حاصل کیں۔

ٹیم میں تبدیلیاں:

کپتان سلمان علی آغا نے ٹاس کے وقت بتایا کہ ٹیم میں دو تبدیلیاں کی گئی ہیں۔ فاسٹ باؤلرز حارث رؤف اور شاہین شاہ آفریدی کو آرام دیا گیا، جب کہ ان کی جگہ حسن علی اور سلمان مرزا کو شامل کیا گیا۔

پس منظر:

یاد رہے کہ سیریز کے پہلے میچ میں پاکستان نے افغانستان کو 39 رنز سے شکست دی تھی، اور اب یو اے ای کے خلاف فتح کے بعد پاکستان کی فائنل میں جگہ تقریباً یقینی ہو گئی ہے۔