لبنانی وزیر داخلہ کی علاقائی امن کیلئے پاکستان کی خدمات کی تعریف

 راولپنڈی: چیف آف آرمی اسٹاف اور چیف آف ڈیفنس فورسز فیلڈ مارشل سید عاصم منیر نے لبنان کے ساتھ دوطرفہ تعلقات مضبوط بنانے کے لیے پاکستان کے عزم کا اعادہ کیا ہے۔

انہوں نے یہ بات لبنان کے وزیر داخلہ احمد الحجار سے گفتگو کرتے ہوئے کہی جنہوں نے آج راولپنڈی میں ان سے ملاقات کی۔

فیلڈ مارشل نے باہمی دلچسپی کے شعبوں میں مشترکہ مفاد پر مبنی تعاون کو مزید وسعت دینے کی خواہش کا اظہار کیا۔

ملاقات کے دوران دونوں شخصیات نے باہمی دلچسپی کے امور، علاقائی سلامتی کی بدلتی ہوئی صورتحال اور سکیورٹی کے شعبے میں دوطرفہ تعلقات مزید بہتر بنانے کے امکانات پر تبادلہ خیال کیا۔

ادارہ جاتی روابط مضبوط بنانے اور وسیع تر تعاون کو فروغ دینے کی اہمیت پر بھی زور دیا گیا۔

لبنان کے وزیر داخلہ نے علاقائی امن و استحکام کے لیے پاکستان کی خدمات کو سراہا اور دہشت گردی کے خلاف جنگ میں پاکستان کی مسلح افواج کی پیشہ ورانہ صلاحیتوں اور قربانیوں کی تعریف کی۔