پاکستان کی سعودی عرب پر حوثی حملوں کی شدید مذمت

پاکستان نے سعودی عرب کے شہروں ابہا، خمیس مشیط، جازان اور نجران میں شہری اور اقتصادی اہداف پر حوثی ملیشیا کے افسوسناک حملوں کی شدید مذمت کی ہے۔

دفتر خارجہ نے ایک بیان میں کہا کہ یہ حملے مملکت کی خودمختاری اور علاقائی سالمیت کی کھلی خلاف ورزی، پورے خطے کے امن و استحکام کے لیے خطرہ اور یمن میں تنازع کے پرامن اور پائیدار حل کی غرض سے کی جانے والی کوششوں کیلئے نقصان دہ ہیں۔

دفتر خارجہ نے سعودی عرب کی خودمختاری، علاقائی سالمیت، سلامتی اور خوشحالی کے لیے پاکستان کی غیر متزلزل حمایت کا اعادہ کیا۔

دفتر خارجہ نے حملوں میں زخمی ہونے والے تمام افراد کی جلد اور مکمل صحت یابی کے لیے پاکستان کی جانب سے نیک خواہشات کا بھی اظہار کیا۔

دفتر خارجہ نے کہا کہ پاکستان خطے میں پائیدار امن اور استحکام کے حصول کے لیے پہلے بھی تمام ممکنہ کوششیں کرتا رہا ہے اور آئندہ بھی کرتا رہے گا۔