جاوید شیخ کی جگہ فیصل رحمان کو کیوں چنا گیا؟ اداکار نے برسوں بعد دل توڑ دینے والی حقیقت بتا دی

ویب ڈیسک: پاکستان شوبز انڈسٹری کے سینئر اداکار جاوید شیخ نے اپنے فنی سفر کے ابتدائی دور کا ایک ایسا واقعہ بیان کیا ہے جس نے مداحوں کو حیران کر دیا۔ انہوں نے بتایا کہ ایک وقت ایسا بھی آیا جب انہیں ایک فلم سے نکال کر ان کی جگہ اداکار فیصل رحمان کو کاسٹ کر لیا گیا، جس پر وہ خود کو سنبھال نہ سکے اور رو پڑے۔

سما ٹی وی کے پروگرام 'گپ شپ' میں میزبان واسع چوہدری سے گفتگو کرتے ہوئے جاوید شیخ نے بتایا کہ اس دور میں ان کی ایک فلم باکس آفس پر کامیاب نہ ہو سکی تھی۔ اسی دوران انہیں ایک نئی فلم کی پیشکش ہوئی اور وہ اس میں کام کرنے کے لیے پوری طرح تیار تھے۔

انہوں نے بتایا کہ فلم کے پروڈیوسرز نے انہیں ملاقات کے لیے بلایا، جہاں انہیں بتایا گیا کہ ڈسٹری بیوٹر کا خیال ہے کہ وہ اس وقت "فلاپ ہیرو" بن چکے ہیں، اس لیے فلم کے کاروبار کو مدنظر رکھتے ہوئے ان کی جگہ فیصل رحمان کو کاسٹ کرنے کا فیصلہ کیا گیا ہے۔

جاوید شیخ نے کہا کہ یہ خبر ان کے لیے انتہائی تکلیف دہ تھی۔ وہ اس فیصلے سے شدید دلبرداشتہ ہوئے اور جذبات پر قابو نہ رکھ سکے۔ ان کے بقول، اس واقعے نے ان کے کیریئر کا سب سے مشکل دور شروع کیا، جس کے بعد انہیں کئی برس تک سخت جدوجہد کرنا پڑی۔

سینئر اداکار نے بتایا کہ وقت گزرنے کے ساتھ حالات بدل گئے اور وہ دوبارہ کامیابی کی بلندیوں پر پہنچ گئے۔ بعد ازاں وہی فلم ساز، جنہوں نے کبھی انہیں فلم سے الگ کیا تھا، ایک نئے منصوبے کے ساتھ دوبارہ ان کے پاس آئے۔

جاوید شیخ کے مطابق انہوں نے ماضی کی تلخ یادوں کو دل میں جگہ نہیں دی اور پیشہ ورانہ رویہ اپناتے ہوئے اس فلم کے لیے کام کرنے پر رضامندی ظاہر کر دی۔ ان کا کہنا تھا کہ انسان کو کامیابی کے بعد بھی دل میں کینہ نہیں رکھنا چاہیے بلکہ آگے بڑھتے رہنا چاہیے۔

جاوید شیخ کے اس انکشاف کے بعد سوشل میڈیا پر مداحوں نے ان کی جدوجہد اور حوصلے کو خوب سراہا۔ کئی صارفین کا کہنا تھا کہ یہی مشکلات بعد میں جاوید شیخ کو پاکستان کی فلم اور ڈرامہ انڈسٹری کے کامیاب ترین اداکاروں میں شامل کرنے کا سبب بنیں۔

آج جاوید شیخ چار دہائیوں سے زائد عرصے سے پاکستانی شوبز انڈسٹری کا نمایاں نام ہیں، جبکہ انہوں نے بالی ووڈ میں بھی اپنی اداکاری کے ذریعے پہچان بنائی۔ ان کا یہ انٹرویو مداحوں کے لیے ان کے فنی سفر کا ایک ایسا پہلو سامنے لایا ہے جس سے بہت کم لوگ واقف تھے۔