وزیر داخلہ محسن نقوی کا دورہ سی ایم ایچ پشاور، پاک فوج اور ایف سی کے اہلکاروں کی عیادت کی

پشاور:وفاقی وزیر داخلہ محسن نقوی نے سی ایم ایچ پشاور کا دورہ کیا جہاں پاک فوج اور فیڈرل کانسٹیبلری کے اہلکاروں کی عیادت کی۔

تفصیلات کے مطابق وزیر داخلہ محسن نقوی فرداً فرداً زخمی اہلکاروں کے پاس گئے اور ان کی خیریت دریافت کی۔ انہوں نے پاک فوج اور ایف سی اہلکاروں کے جذبے اور فرض شناسی کو سراہا، اور زخمی اہلکاروں کے بلند حوصلے کی تعریف کی۔

اس موقع پر وزیر داخلہ محسن نقوی نے اہلکاروں کے علاج معالجے کے بارے ڈاکٹرز سے اپ ڈیٹس لیں۔ ان کا کہنا تھا کہ آپ نے جوانمردی سے دہشت گردوں  کے ناپاک عزائم کو ناکام بنایا،آپ قوم کے ہیرو ہیں،ہم سب کو آپ پر فخر ہے، آپ جیسے بہادر سپوتوں کے ہوتے ہوئے دشمن کی کوئی سازش کامیاب نہیں ہو سکتی۔

علاوہ ازاں خیبرپختونخوا حکومت کے چیف سیکرٹری شہاب علی، آئی جی ایف سی نذیر احمد گاڑا بھی اس موقع پر موجود تھے۔