گلگت بلتستان کی الیکشن مہم کے دوران پی ٹی آئی رہنما جنید اکبر گرفتار

گلگت بلتستان کی الیکشن مہم کے دوران ‏صوبائی صدر پی ٹی آئی خیبرپختونخوا جنید اکبر خان کو گرفتار کر لیا گیا۔

تفصیلات کے مطابق جنیداکبرخان کوگلگت بلتستان پولیس نے ہنزل کے مقام پر حراست میں لیا، وہ الیکشن مہم کے سلسلے میں گلگت بلتستان کا دورہ کررہے تھے۔اُن کا کہنا تھا کہ مجھے کہا گیا کہ آپ کا این او سی نہیں، گلگت سے نکل جائیں۔

پولیس حکام کا کہنا ہے کہ پی ٹی آئی خیبر پختونخوا کے صدر جنید اکبر کو گرفتار کر لیا گیا، جنید اکبر اور ان کے ساتھیوں کو ہینزل کے مقام سے گرفتار کیا گیا۔

پولیس حکام کا کہنا ہے کہ جنید اکبر اور ان کے ساتھیوں کو گلگت بلتستان سے باہر نکالا جائے گا۔

دوسری جانب چیئرمین پی ٹی آئی بیرسٹر گوہر نے کہا کہ جنید اکبر کی گرفتاری اور انہیں الیکشن کمپین سے روکنا قابل مذمت اور پری پول ریگنگ ہے۔

اپنے بیان میں بیرسٹر گوہر نے کہا کہ ملک بھر میں لوگوں کو جانے کی اجازت ہونی چاہیے، گلگت بلتستان میں بھی سیاسی سپیس نہ دینے  سے جمہوریت کو نقصان ہو گا۔

اُن کا مزید کہنا تھا کہ الیکشن کمیشن یکساں انتخابی مہم موقع دیں۔