شہبازشریف کا جاپانی وزیر اعظم سے رابطہ،امریکہ ایران مذاکرات پر تبادلہ خیال

اسلام آباد:وزیراعظم محمد شہباز شریف کا جاپان کی وزیراعظم سانائے تاکائیچی سے ٹیلیفونک رابطہ ہوا ہے،رابطے کے دوران دونوں رہنماؤں نے حال ہی میں اسلام آباد میں پاکستان کی میزبانی میں ہونے والے امریکہ اور ایران کے درمیان مذاکرات پر تبادلۂ خیال کیا۔

تفصیلات کے مطابق رابطے میں جاپان کی وزیراعظم تاکائیچی نے جنگ بندی اور مذاکرات کے انعقاد میں پاکستان کے سفارتی کردار کو سراہا۔ انہوں نے امن قائم کرنے کے عمل کی مکمل حمایت کا اظہار کرتے ہوئے اسے علاقائی استحکام اور عالمی توانائی سلامتی کے لیے اہم قرار دیا۔ 

ٹیلیفونک رابطے میں وزیراعظم محمد شہباز شریف نے جاپانی ہم منصب کی نیک خواہشات پر ان کا شکریہ ادا کرتے ہوئے کہا کہ وہ امریکہ اور ایران کے وفود کے اسلام آباد میں ہونے والے تفصیلی مذاکرات پر شکر گزار ہیں ۔

وزیراعظم نے کہا کہ پاکستان جنگ بندی کو برقرار رکھنے کے لیے اپنی کوششیں جاری رکھے گا۔ انہوں نے پاکستان اور جاپان کے درمیان دوطرفہ تعاون کو مزید مضبوط بنانے کی خواہش کا اظہار کیا، جسے جاپانی وزیراعظم نے بھی سراہا۔

ٹیلیفونک گفتگو کے دوران دونوں رہنماؤں نے قریبی رابطہ برقرار رکھنے پر اتفاق کیا۔