وزیر اعظم سےایمانوئل میکرون کا رابطہ،مشرق وسطیٰ میں جنگ بندی اورثالثی پر پاکستان کی تعریف

اسلام آباد: وزیر اعظم شہباز شریف سے فرانس کے صدر ایمانوئل میکرون نے ٹیلیفونک رابطہ کیا ہے جس میں میکرون نے مشرق وسطیٰ میں جاری کشیدگی کے خاتمے اور ایران امریکا ثالثی کے حوالے سے پاکستان کے نمایاں کردار کی تعریف کی اورسلام آباد میں ہونے والے امن مذاکرات کی کامیابی کے لیے بھی اپنی نیک خواہشات کا اظہار کیا۔

ٹیلیفونک رابطے میں وزیراعظم شہباز شریف نے صدر میکرون کی جانب سے پاکستان کی سفارتی کاوشوں کی حمایت پر شکریہ ادا کیا،وزیراعظم نے اس عزم کا اعادہ کیا کہ پاکستان خطے میں امن و استحکام کے لیے اپنی کوششیں جاری رکھے گا۔

گفتگو کے دوران دونوں رہنماؤں نے لبنان میں جاری جارحیت پر گہری تشویش کا اظہار کیا اور زور دیا کہ تشدد اور خونریزی کا فوری خاتمہ ضروری ہے تاکہ پورے خطے میں امن بحال کیا جاسکے۔

دونوں رہنماؤں نے آئندہ بھی باہمی رابطے میں رہنے پر اتفاق کیا۔