کالعدم ٹی ٹی پی، بی ایل اے اور دیگر گروہوں کی کارروائیاں ہرگز برداشت نہیں کی جائیں گی،صدر مملکت

اسلام آباد: پارلیمنٹ کے مشترکہ اجلاس سے خطاب کرتے ہوئے صدرِ مملکت آصف علی زرداری نے کہا ہے کہ کالعدم ٹی ٹی پی، بی ایل اے اور دیگر دہشت گرد گروہوں کی کارروائیاں ہرگز برداشت نہیں کی جائیں گی اور ان کے خاتمے تک جنگ جاری رہے گی۔

تفصیلات کے مطابق پارلیمنٹ کا مشترکہ اجلاس جاری ہے، اجلاس سپیکر ایاز صادق کی صدارت میں شروع ہوا، وزیراعظم شہباز شریف بھی ایوان میں موجود ہیں، پارلیمنٹ کے اس خصوصی اجلاس میں صوبوں کے وزرائے اعلیٰ اور گورنر بھی شریک ہیں جبکہ غیر ملکی سفیر بھی شریک ہیں، آغاز میں قومی ترانہ بجایا گیا، تلاوت کلام پاک ہوئی جس کے بعد صدر مملکت پارلیمنٹ کے مشترکہ اجلاس سے خطاب کر رہے ہیں۔

پارلیمنٹ کے مشترکہ اجلاس کے آغاز میں ایران کے سپریم لیڈر آیت اللہ خامنہ ای، عرب ممالک پر حملے میں جاں بحق افراد اور سیکیورٹی فورسز کے شہدا کے لیے فاتحہ خوانی کی گئی جب کہ اپوزیشن کی طرف سے صدر کے خطاب کے دوران مسلسل احتجاج کیا گیا، نعرہ بازی کی گئی۔

صدر مملکت نے پارلیمنٹ سے خطاب کرتے ہوئے کہا کہ بطور 2 بار منتخب صدر مملکت پارلیمنٹ سے یہ میرا 9واں خطاب ہے، نئے پارلیمانی سال کے آغاز پر ہمیں اسی عزم کو آگے بڑھانا ہے، قوموں کا امتحان صرف بحران میں نہیں ،اہم موڑ پر بھی ہوتا ہے۔

اپنے خطاب میں انہوںنے کہا کہ اقوام متحدہ کے چارٹر کا آرٹیکل 51 ہمیں اپنی خودمختاری کا دفاع کرنے کا حق دیتا ہے، سرحد پار دہشت گردی کے خلاف پوری قوم اپنی مسلح افواج کے شانہ بشانہ ہے، افغانستان سے دہشت گردوں کی دراندازی روکنے کیلئے سفارت کاری کی ہر ممکن کوشش کی۔

دوران خطاب صدر مملکت نے ایران کے ساتھ مذاکرات کے دوران چھیڑی جانے والی جنگ کی شدید مذمت کی، خطے کو مزید بحران سے بچانے کیلئے امن، تحمل اور مذاکراتی حل پر زور دیا اور کہا کہ  پاکستان اور امریکا میں اسٹریٹجک تعاون اور شراکت داری کی نئی راہیں کھلی ہیں، پاکستان اور چین کے تعلقات نئی بلندیوں پر پہنچے ہیں۔

انہوں نے کہا کہ جمہوریہ کی طاقت آئین ، عوامی ثابت قدمی،پارلیمنٹ اور حکومت کی ذمہ داری ،مسلح افواج کے حوالے میں مضمر ہے، ملکی خودمختاری کا تحفظ، آئین کی حکمرانی اور معاشی ترقی کو فروغ دینا ہے، اپنے شہریوں کی خوشحالی اور امن کیلئے ترقی اور استحکام کا عمل آگے بڑھانا ہے۔

صدر مملکت کا مزید کہنا تھا کہ گزشتہ دس ماہ میں ہماری قوم نے پیچیدہ چیلنجز کا سامنا کیا، دونوں سرحدوں پر بلااشتعال حملوں پر ہماری افواج نے غیر معمولی پیشہ ورانہ مہارت اور نظم و ضبط کا ثبوت دیا، ہماری بہادر افواج نے معرکۂ حق میں بھارتی حملے کو تاریخی تذویراتی فتح میں بدل دیا، 26 فروری کی رات طالبان رجیم نے مغربی سرحد پر حملے کیے۔

کشمیر کی صورتحال پر گفتگو کرتے ہوئے صدر مملکت نے کہا کہ مقبوضہ جموں و کشمیر کے عوام کی منصفانہ جدوجہد کی اخلاقی و سفارتی حمایت جاری رکھنے کے عزم کا اعادہ کیا اور کہا کہ جنوبی ایشیا میں پائیدار امن مسئلہ کشمیر کے منصفانہ حل سے مشروط ہے۔

انہوں نے واضح کیا کہ پاکستان ایک ذمہ دار ایٹمی ریاست ہے، جنگ کبھی پہلا آپشن نہیں مگر اپنی خودمختاری اور سرزمین کے دفاع کا حق محفوظ ہے۔

صدر مملکت نے کہا کہ آج ہم ان بنیادوں پر کھڑے ہیں جو ہماری قومی جدو جہد کے معماروں نے رکھی تھیں، قائد اعظم نے ایسی جمہوری ریاست کا تصور پیش کیا جو آئین اور قانون کی حکمرانی پر قائم ہو، شہیدذوالفقار علی بھٹو نے قوم کو متفقہ آئین دیا۔

انہوں نے کہا کہ بے نظیر بھٹو شہید نے قربانی اور مثالی قیادت سے جمہوری عمل کو مضبوط کیا ، پارلیمنٹ کی بالادستی پر میرا یمان صرف الفاظ تک محدود نہیں،عملی اقدامات سے ظاہر ہے، سلامتی کونسل رپورٹ میں افغانی دہشتگردوں کو علاقائی سے بڑھ کر عالمی خطرہ قرار دیا گیا۔