آسٹریلیا کی بھارت پر فتح، تیسری بار سلطان آف جوہر ہاکی ٹائٹل اپنے نام کرلیا

جوہر بارو (اسپورٹس رپورٹر) — آسٹریلیا نے سلطان آف جوہر انٹرنیشنل ہاکی ٹورنامنٹ 2025 کے فائنل میں بھارت کو سنسنی خیز مقابلے کے بعد 1-2 سے شکست دے کر ٹائٹل اپنے نام کر لیا۔ یہ تیسری بار ہے کہ آسٹریلوی ٹیم نے یہ اعزاز جیتا۔

ملائیشیا کے شہر جوہر بارو کے تمان دیا ہاکی اسٹیڈیم میں کھیلے گئے فائنل میں آسٹریلیا کی جانب سے گروبیلار این نے دو گول اسکور کیے، پہلا 13ویں اور فیصلہ کن دوسرا گول 59ویں منٹ میں کیا۔ بھارت کی طرف سے واحد گول 17ویں منٹ میں ایکا انمول نے کیا۔

تیسری پوزیشن کے میچ میں برطانیہ نے پاکستان کو 2-3 سے شکست دی۔ پاکستانی ٹیم کی نمائندگی کرنے والے سفیان خان نے ایونٹ میں 9 گول اسکور کر کے ٹورنامنٹ کے ٹاپ اسکورر کا اعزاز حاصل کیا۔ قومی ٹیم کے کپتان حنان شاہد 5 گول کے ساتھ دوسرے نمبر پر رہے۔

پاکستان نے ایونٹ میں مجموعی طور پر پانچ میچز کھیلے۔ پہلے میچ میں میزبان ملائیشیا کو 2-7 سے شکست دی، دوسرے میں برطانیہ سے 1-6 سے ہارا، جبکہ بھارت کے خلاف میچ 3-3 سے برابر رہا۔ چوتھے میچ میں نیوزی لینڈ نے پاکستان کو 2-3 سے شکست دی، اور آخری گروپ میچ میں آسٹریلیا سے مقابلہ بھی 3-3 سے برابر رہا۔

ایونٹ کی تاریخ میں برطانیہ سب سے زیادہ 4 بار، بھارت 3 بار اور اب آسٹریلیا 3 بار چیمپئن بن چکا ہے۔ پانچویں پوزیشن کے لیے کھیلے گئے میچ میں ملائیشیا نے نیوزی لینڈ کو 3-5 سے شکست دی۔