چائلڈ کانٹینٹ کریئیٹر طلحہ احمد کا انسٹاگرام اکاؤنٹ معطل، مداحوں میں تشویش

کراچی سے تعلق رکھنے والے کم عمر اور مقبول چائلڈ کانٹینٹ کریئیٹر طلحہ احمد کا انسٹاگرام اکاؤنٹ معطل کر دیا گیا، جس پر ان کے لاکھوں مداحوں نے تشویش کا اظہار کیا ہے۔

طلحہ احمد بلدیہ ٹاؤن کراچی کے رہائشی ہیں اور تھیلیسیمیا جیسے مرض میں مبتلا ہونے کے باوجود سوشل میڈیا پر سادہ، سبق آموز اور مثبت ویڈیوز بنانے کی وجہ سے شہرت حاصل کر چکے ہیں۔ انہوں نے جولائی 2024 میں سوشل میڈیا پر ویڈیوز بنانا شروع کی تھیں، جب کہ 2025 کے آغاز میں انہوں نے اس میدان میں باقاعدہ دلچسپی لینا شروع کی۔

ان کے انسٹاگرام اکاؤنٹ پر فالوورز کی تعداد پانچ لاکھ سے تجاوز کر گئی تھی، جب کہ وہ فیس بک، یوٹیوب اور ٹک ٹاک پر بھی فعال اور مقبول تھے۔ طلحہ کا مواد نہایت سادہ، تعلیمی اور غیر متنازعہ نوعیت کا ہوتا ہے۔

21 اگست کو طلحہ احمد نے سوشل میڈیا پر بتایا کہ ان کا انسٹاگرام اکاؤنٹ بغیر کسی واضح وجہ کے معطل کر دیا گیا ہے۔ انہوں نے انسٹاگرام کی جانب سے موصول ہونے والا اسکرین شاٹ بھی شیئر کیا، جس میں صرف پلیٹ فارم کے رولز کی خلاف ورزی کا ذکر تھا، مگر کسی مخصوص خلاف ورزی کی وضاحت نہیں کی گئی۔

ممکنہ طور پر طلحہ احمد کا اکاؤنٹ ان کی عمر کم ہونے کی وجہ سے معطل کیا گیا ہو، تاہم اس حوالے سے تاحال کوئی باضابطہ مؤقف سامنے نہیں آیا۔ یاد رہے کہ انسٹاگرام پر 13 سال سے زائد عمر کے افراد کو اکاؤنٹ بنانے کی اجازت ہے، مگر 16 سال سے کم عمر صارفین کو کئی فیچرز تک محدود رسائی دی جاتی ہے۔

طلحہ نے نئی امید کے ساتھ انسٹاگرام پر واپسی کا عندیہ دیا ہے اور مداحوں سے صبر اور سپورٹ کی اپیل کی ہے۔