ضمانت بریت نہیں، 9 مئی کے ماسٹر مائنڈ کو قانون کے کٹہرے میں لائیں گے: عطا تارڑ

وفاقی وزیر اطلاعات عطا تارڑ نے کہا ہے کہ ضمانت کا مطلب بریت نہیں ہوتا، مقدمے کا ٹرائل جاری ہے اور اسے منطقی انجام تک پہنچنا ضروری ہے۔

اسلام آباد میں میڈیا سے گفتگو کرتے ہوئے عطا تارڑ کا کہنا تھا کہ 9 مئی کے واقعات پوری قوم نے دیکھے، جن کے پیچھے اصل منصوبہ ساز بانی تحریک انصاف تھے۔ انہوں نے ایسا ماحول پیدا کرنے کی کوشش کی جس سے ریاست مخالف عناصر کو فائدہ ہو۔ پی ٹی آئی کے پاس ان واقعات کا کوئی جواز یا دفاع موجود نہیں۔

عطا تارڑ نے مزید کہا کہ تحریک انصاف کے رہنما ضمانت پر خوشیاں مناکر خود کو دھوکا دے رہے ہیں، حالانکہ ضمانت تو قاتل اور ڈکیت کو بھی مل جاتی ہے۔ عوام نے پی ٹی آئی کے بیانیے کو یکسر مسترد کر دیا ہے۔ ان کا کہنا تھا کہ جھوٹی خوشی سے قوم کو بیوقوف نہیں بنایا جا سکتا، پی ٹی آئی کو اپنے رویے پر سنجیدگی سے غور کرنا چاہیے۔

انہوں نے کہا کہ یہ کیسے ممکن ہے کہ پاکستان کو ملنے والی رقم کسی جرمانے کی مد میں جمع کرا دی جائے؟ انہوں نے قیمتی انگوٹھیاں کس بنیاد پر حاصل کیں؟ کابینہ سے ایک بند لفافے میں معاہدے کی منظوری لی گئی، اور بانی پی ٹی آئی نے کہا کہ لفافے کے مندرجات کو نظرانداز کرکے بس منظوری دی جائے۔ 190 ملین پاؤنڈ کے مقدمے میں وہ اپنے دفاع میں کچھ بھی پیش نہ کر سکے۔

عطا تارڑ کا کہنا تھا کہ محض ایک ضمانت پر اس قدر جشن منانا ناقابل فہم ہے۔ شبلی فراز اور عمر ایوب کو بھی سزا ہوئی تھی، اور بعد میں ضمانت ملی تھی۔ بانی تحریک انصاف اب بھی 190 ملین پاؤنڈ کیس میں قید ہیں اور صرف ضمانت سے رہائی ممکن نہیں۔ انہیں شاید ضمانت اور بریت کے فرق کا علم نہیں۔ پی ٹی آئی کی طرف سے ضمانت پر خوشی منانا عقل سے ماورا ہے۔ ان کے خلاف توشہ خانہ ٹو کیس بھی زیر سماعت ہے، جہاں وہ بار بار تاریخیں لے رہے ہیں، جبکہ ان کے خلاف ناقابل تردید شواہد موجود ہیں۔