پاکستان کو ڈیجیٹل سرمایہ کاری میں شفافیت لانے کی ضرورت ہے : وزیر خزانہ

وفاقی وزیر خزانہ سینیٹر محمد اورنگزیب نے کہا ہے کہ پاکستان کا بینکنگ نظام دیگر ممالک کی نسبت زیادہ پیچیدہ ہے، جسے سادہ اور آسان بنانے کی ضرورت ہے تاکہ تاجروں اور سرمایہ کاروں کو مزید سہولت مل سکے۔

اسلام آباد میں ایک تقریب سے خطاب کرتے ہوئے انہوں نے کہا کہ حکومت کی پہلی ترجیح تاجروں اور سرمایہ کاروں کے لیے آسانیاں پیدا کرنا ہے۔ ان کا کہنا تھا کہ معاشی اصلاحات کا عمل جاری ہے اور معیشت میں بہتری آ رہی ہے۔

وزیر خزانہ نے اس بات کا ذکر کیا کہ اس وقت ملک میں صرف 10 سے 15 فیصد لوگ ڈیجیٹل کاروبار سے فائدہ اٹھا رہے ہیں، لیکن مستقبل میں ڈیجیٹل اثاثوں کا رجحان بڑھنے کی توقع ہے۔ اس لیے، ضروری ہے کہ ڈیجیٹل سرمایہ کاری میں شفافیت کو یقینی بنایا جائے۔

انہوں نے مزید کہا کہ ڈیجیٹل سرمایہ کاری سے متعلق قوانین میں بہتری لانے کی ضرورت ہے تاکہ بین الاقوامی معیار کے مطابق ایک مؤثر نظام وضع کیا جا سکے۔

محمد اورنگزیب نے یہ بھی بتایا کہ کرپٹو مائننگ پر بھی غور جاری ہے، اور اس کے لیے کرپٹو کونسل تشکیل دی جا چکی ہے، جو اس شعبے کی ترقی پر کام کر رہی ہے۔